SECCIONES
ARMENIA
LOCALES
DIÁSPORA
UGAB
INSTITUCIONES
EMPRENDIMIENTOS Y PYMES
OPINION
AGENDA
SOCIALES
Temp.: -
Hum.: -
Jueves 28 de Marzo - Buenos Aires - Argentina
PREMIO MEJOR MEDIO DE PRENSA PUBLICADO EN LENGUA EXTRANJERA - MINISTERIO DE LA DIASPORA DE ARMENIA 2015
UGAB - Հայկական բարեգործական ընդհանուր միություն
ՀԲԸՄ-Ի ՀԱՅՏԱՐԱՐՈՒԹՅՈՒՆԸ ՀՀ ԿԱՌԱՎԱՐՈՒԹՅԱՆ ՁԵՎԱՎՈՐՄԱՆ ԿԱՊԱԿՑՈՒԹՅԱՄԲ
09 de Agosto de 2021

ՀԲԸՄ-Ի ՀԱՅՏԱՐԱՐՈՒԹՅՈՒՆԸ ՀՀ ԿԱՌԱՎԱՐՈՒԹՅԱՆ ՁԵՎԱՎՈՐՄԱՆ ԿԱՊԱԿՑՈՒԹՅԱՄԲ

9 օգոստոս 2021թ.

Հայկական բարեգործական ընդհանուր միությունն իր շնորհավորանքներն է հայտնում Հայաստանի Հանրապետության վարչապետ Նիկոլ Փաշինյանին և իր թիմին նոր կառավարության ձևավորման կապակցությամբ։ Սա ինքնին դրական ձեռքբերում է՝ հաշվի առնելով երկրի ներքաղաքական անկայունությունը և տարածաշրջանում առկա աշխարհաքաղաքական լրջագույն մարտահրավերները։ 

Հայկական սփյուռքը Հայաստանի ապագայով մտահոգ բարեկամ ժողովուրդների հետ միասին ողջունում է ընտրությունների միջոցով երկրում բնականոն կյանքի աստիճանական վերադարձը։ Սա կարևոր նախապայման է հյուծիչ պատերազմից և ներքաղաքական լարվածությունից հետո վերականգնվելու և հարյուրավոր հայ ռազմագերիներին տուն վերադարձնելու աշխատանքները շարունակելու համար։ 

Թեև Հայաստանի ժողովուրդն իր քվեարկությամբ կողմ է արտահայտվել կայունությանը և խաղաղությանը, Հայաստանի նոր կառավարությունը ստիպված է լինելու առերեսվել հետպատերազմյան դժվարությունների ու ազգային անվտանգության սպառնալիքների հետ՝ պայմանավորված  Հարավային Կովկասի աշխարհաքաղաքական իրավիճակով։

Մենք հուսով ենք, որ այս պայմաններում ձայների մեծամասնությունը ստացած վարչապետն ու իր կառավարությունը վճռական կգտնվեն երկրի զարգացման ճանապարհին տեղական և միջազգային լավագույն մասնագետներին ընդգրկելու գործում։ Իրապես, այսօր Հայաստանի և Արցախի ինքնիշխանությունն ու  անվտանգությունը մեծապես կախված են առաջիկա ամիսներին և տարիներին կայացրած կարճաժամկետ որոշումներից և երկարաժամկետ հանձնառությունից։ 

Այս առումով, Սփյուռքի համայնքների, քաղաքացիական հասարակության, եկեղեցու ու այլ կառույցների մասնակցությունը և համախմբումն ամուր հիմք կլինեն գալիք դրական փոփոխությունների համար։

Այս նպատակին հասնելու համար մենք ակնկալում ենք, որ Հայրենիք-Սփյուռք համագործակցության, համատեղ աշխատանքի և երկխոսության համար կստեղծվեն ավելի հստակ և անմիջական  մեխանիզմներ՝ հնարավորություն տալով օտար երկրներում ապրող Հայաստանի քաղաքացիներին նշանակվել պետական բարձր պաշտոններում (ինչը ենթակա է խորհրդարանի հաստատմանը)։ Օրինակ՝ Հայաստանում մեկ տարվա մշտական բնակությունը կարող է նվազագույն անհրաժեշտ շեմ լինել պետական պաշտոններում նրանց նշանակման համար։ 

Ցավալիորեն, այսօր Հայաստանը բախվել է մոտալուտ ժողովրդագրական աղետի։ 44-օրյա պատերազմը և արտագաղթի ահագնացող տեմպերը ևս մեկ հարված էին մեր Հայրենիքի ժողովրդագրական վատթար վիճակին, ինչի հաղթահարման համար անհրաժեշտ են համապարփակ քայլեր՝ ապահովելու Հայաստանի ժողովրդագրական կենսունակությունը։ 
Այսօր, առավել քան երբևէ, Հայաստանը պետք է հավատարիմ մնա ժողովրդավարական չափանիշներին և մարդու իրավունքների պաշտպանությանը, ապահովի դատական համակարգի անաչառությունը, պաշտպանի սեփականության իրավունքն ու իրականացնի թափանցիկ ու ազատ տնտեսական քաղաքականություն։ 

Միևնույն ժամանակ, հարկավոր է ներդնել ավելի արդյունավետ կարգավորումներ տնտեսության մեջ՝ հակազդելու ազգային անվտանգության այն սպառնալիքներին, որոնք սերում են ներկայիս տնտեսական վարչարարությունից։ Առաջին քայլերից կարող է լինել քաղաքացիություն չունեցող անձանց կողմից հողի սեփականության իրավունքի սահմանափակումները։ 

Մենք նաև հուսով ենք, որ Հայաստանը կշարունակի իրականցնել հայկական քաղաքակրթության պահպանման սրբազան առաքելությունը՝ զուգահեռ պաշտպանելով ու զարգացնելով հայկական ինքնության հիմնասյուները՝ լեզուն, մշակույթը, կրթությունը և եկեղեցին։ 

ՀԲԸՄ-ն պատրաստ է իր ողջ կարողությունները ծառայեցնել այս նպատակներին հասնելու համար։ Մենք կշարունակենք մեր առաքելությունը՝ օգնելով վերակառուցել ավելի անվտանգ և ծաղկուն ապագա։ Մենք շարունակում ենք հանձնառու մնալ հավաքագրելու ՀԲԸՄ աշխարհասփյուռ անդամներին և բոլոր հնարավորությունները՝ օգնելով իրացնելու այն ներուժը, որը առկա է յուրաքանչյուր հայ մարդու մեջ՝ պետական ծառայողներից և գործարարներից մինչև երիտասարդներ և հասարակության այլ անդամներ։

Más leídas