Միացեալ Նահանգներու Քալիֆորնիոյ նահանգի Լոս Անճելըի Հ․Բ․Ը․Մ․ի Մանուկեան-Տէմիրճեան Վարժարանի սաները, որոնք Յուլիս 24-էն ի վեր կը գտնուէին Արժանթինի Հանրապետութիւն, որպէս աւելի քան 20 տարի շարունակուող դպրոցական փոխանակման ծրագրի հերթական մասնակիցներ, անցեալ Ուրբաթ, Օգոստոս 4-ին, այցելեցին Պուէնոս Այրէսի Թէքէեան Մշակութային Միութեան Կեդրոն։
Երիտասարդները, որոնք եկած էին վարժարանի համակարգողներ Վերոնիքա Գարատանեանի եւ ուսուցչուհի Թալին Հաշլեանի, ինչպէս նաեւ տեղւոյն համակարգող Միրիամ Պօղոսեանի ուղեկցութեամբ, ընդունուեցան հաստատութեան նախագահ Սերխիօ Նահապետեանի, Սանթիակօ Տագէսեանի, Խօսէ Թապագեանի, ուսուցչուհի Ելենա Աշճեանի եւ միւս անդամներու կողմէ, որոնք մեծ ուրախութեամբ ցոյց տուին հաստատութեան յարմարութիւնները, մանաւանդ արուեստի գործերը, որոնց շարքին վարպետ Մանուել Ղըրիտեանի հայոց պատմութիւնը պատկերող որմնանկարը։ Ան հեղինակն է նաեւ Թէքէեան Մշակութային Միութեան կեդրոնի մուտքին գտնուող Սարդարապատի յուշարձանին։
Խումբին կ՛ուղեկցէին Հ․Բ․Ը․ Միութեան Պուէնոս Այրէսի Մասնաճիւղի Ատենապետ Անթոնիօ Սարաֆեանը տիկնոջ հետ, որոնք ուսանողներուն հետ միասին մասնակցեցան սփիւռքահայերու դերին, հայ մշակոյթի պահպանման եւ տարածման կարեւորութեան, մանաւանդ աշխարհի որեւէ կողմ հայկականութեան արմատներու սերմանումին առնչուող հարցերու շուրջ հաճելի քննարկումին, ինչպէս կ՛ապացուցանէ Հարաւային թէ Հիւսիսային Ամերիկաներու գաղութներու պատմութիւնը, ուր կառուցուած եւ ստեղծուած են փոքր եւ մեծ հայկական գաղութներ՝ հեռու նախնիներու հայրենիքէն։
Ուսանողներուն ներկայացուեցան Հայաստանի եւ Արցախի վերաբերեալ թարմացուած նիւթեր, որոնք, որպէս ընթերցանութեան հետաքրքրական նիւթ, համակարգողներու կողմէ պիտի օգտագործուին Լոս Անճելըսի իրենց ուսումնական հաստատութեան մէջ։
Շատ հետաքրքրական այցելութիւն մըն էր եւ, միեւնոյն ատեն, հաճելի, քանի որ անգամ մը եւս իրականացուցինք հայկականութիւնը աշխարհի բոլոր ծայրերը տարածելու, պահպանելու եւ վառ պահելու մեր նպատակը։ Քարտէզի հակառակ կողմերը գտնուող երկու հայկական դպրոցներու փոխանակման այս ծրագիրը վառ օրինակն է ատոր:
Կը շնորհաւորենք Հ․Բ․Ը․ Միութիւնը եւ փոխանակման ծրագրի քաջալերողները եւ ղեկավարները:
