ԻԱՌԱ – Արժանթինի Հանրապետութեան Հայկական Հաստատութիւնները, ներկայացնելով հաւատքի, մշակոյթի եւ յիշատակի պատմական կապերով միացած համայնք մը, կը դատապարտենք ամենավճռական կերպով այն ծանր պետական գործողութիւնները, որոնք կ՚ոտնահարեն մեր Սուրբ Եկեղեցւոյ ինքնավարութիւնը, ինչպէս նաեւ Ամենայն Հայոց Կաթողիկոս Գարեգին Բ. Սրբազան Հօր դէմ ընթացող քրէական հետապնդումը։

Գրեթէ 2000-ամեայ պատմութեան ընթացքին, Հայ Առաքելական Եկեղեցին հիմնական դեր խաղացած է որպէս մեր ժողովուրդի ինքնութեան, հոգեւորութեան եւ միասնականութեան սիւն։

Մեր պատմութեան ամենադժուար պահերուն, Եկեղեցին եղած է ազգային միասնականութիւնը պահպանող փարոսը, աշխարհագրական սահմանները անցնելով՝ ապաստանելով եւ պահպանելով ամբողջ Սփիւռքը։

Այս ժառանգութեան անբաժանելի մասը կազմող Արժանթինի հայ համայնքը՝ Թուրքիոյ գործած Ցեղասպանութեան վերապրողներուն ջանքով եւ տոկունութեամբ կերտուած ու յաջորդական սերունդներով ամրապնդուած՝ միշտ իր եկեղեցիները ունեցած է որպէս իր համայնքային, ընկերային եւ կրթական կեանքի կորիզը։

Արժանթինեան ընկերութեան մէջ մեր ինտեգրումը եւ երկրին մէջ մեր արմատներուն պահպանումը կարելի չէին ըլլար առանց մեր Մայր Եկեղեցւոյ հաստատութենական ու հոգեւոր հովանաւորութեան, որ անխզելիօրէն կապում է Սփիւռքի մէջ մեր ներկան մեր ծննդավայրին ճակատագրին հետ։

Այս խոր փորձառութեան հիման վրայ, մենք անընդունելի հաստատութենական ոտնձգութիւն կը համարենք աշխարհիկ դատարաններուն ներխուժումը դէպի Եկեղեցւոյ խստիւ կանոնական ու կազմակերպչական հարցերը։ Այս բացայայտ պետական միջամտութիւնը եկեղեցական կառոյցին մէջ կ՚աղաւաղէ ժողովրդավարական կարգը եւ ուղղակիօրէն կը սպառնայ կրօնական ազատութեան։

Այն ժամանակ, երբ Հայաստանը կը դիմագրաւէ նշանակալի աշխարհաքաղաքական մարտահրաւէրներ, պետական ապարատէն մղուած այս առճակատումը ուղղակիօրէն կը թուլացնէ ամբողջ ազգին դիմադրողականութիւնը՝ խախտելով մեր հայրենիքի գոյատեւման համար անհրաժեշտ ներքին համախմբուածութիւնը։

Այս իրավիճակը յատուկ հրատապութիւն կը ստանայ Օգոստոս 7-ին նախատեսուած դատական լսումին առջեւ, որուն ընթացքին այս գործի կեդրոնական երեսակները պիտի լուծուին, եւ որուն հայ համայնքը ուշադրութեամբ պիտի հետեւի։

Հետեւաբար, Արժանթինի Հանրապետութեան հայ համայնքը կը պահանջէ Ամենայն Հայոց Կաթողիկոս Գարեգին Բ. Սրբազան Հօր եւ Գերագոյն Հոգեւոր Խորհուրդի անդամներուն դէմ բացուած քրէական գործերուն անմիջական եւ անվերապահ չեղարկումը։

Այս դատական հալածանքին վերջ տալը միակ ճամբան է մեր ազգին հաստատութենականութիւնն ու արժանապատուութիւնը պաշտպանելու համար։ Կը պահանջենք որ իրաւասու պետական մարմինները դադրեցնեն այս թշնամանքը եւ անվերապահօրէն յարգեն Հայ Առաքելական Եկեղեցւոյ ինքնավարութիւնն ու պատմական ժառանգութիւնը, երաշխաւորելով մեր ժողովուրդին պահանջած ընկերային խաղաղութիւնը։

Արժանթինի հայ համայնքը անտարբեր պիտի չմնայ այս գործի ելքին հանդէպ եւ ակտիւօրէն պիտի հետեւի դէպքերուն, Սփիւռքի հայկական հաստատութիւններուն եւ մարդկային իրաւանց ու կրօնական ազատութեան միջազգային կազմակերպութիւններուն հետ համագործակցելով։

ԻԱՌԱ – Արժանթինի Հանրապետութեան Հայկական Հաստատութիւնները